अहिल्यानगरमध्ये खळबळ : ‘लाच’ प्रकरणी सहायक फौजदार व आंबेडकरी नेते जाळ्यात!
अहिल्यानगर । पोलीस न्यूज नेटवर्क
गांजा प्रकरणात मदत करण्यासाठी तब्बल पाच लाख रुपयांच्या लाचेची मागणी करत अखेर दीड लाख रुपयांवर तडजोड करुन पैसे स्वीकारताना सहायक फौजदार राजेंद्र प्रभाकर गर्गे (राहणार समर्थ नगर, सावेडी) आणि आंबेडकरी चळवळीतील ज्येष्ठ नेते अशोक रामचंद्र गायकवाड (वय ७१, व्यवसाय – शेती, राहणार बिशोब लॉइड कॉलनी, सावेडी, जिल्हा अहिल्यानगर) यांना अटक करण्यात आली आहे. लाचलुचपत प्रतिबंधक विभागाने दोघांना ताब्यात घेऊन तोफखाना पोलिसांच्या स्वाधीन केले.
या कारवाईने संपूर्ण अहिल्यानगर जिल्ह्यात मोठी खळबळ उडाली आहे. अनेक वर्षांपासून नगर शहरातील विविध पोलीस ठाण्यांत कार्यरत असलेले गर्गे हे गुन्हे शोध व गोपनीय शाखेत कार्यरत असल्याने त्यांचा परिचय आणि दबदबा आहे. तर गायकवाड हे अनेक दशकांपासून राजकारणात सक्रिय असून, त्यांनी अनेक निवडणुका लढवल्या आहेत. मोठ्या नेत्यांशी त्यांचे निकटचे संबंध असल्याचे बोलले जाते. नुकतेच ते राष्ट्रवादी काँग्रेसच्या अजित पवार गटात गेल्याचे बोलले जात असून अजित पवार यांच्याशी हितगुज करताना त्यांचे छायाचित्र आहेत. या परिस्थितीत गर्गे आणि अशोक गायकवाड यांना लाचेच्या गुन्ह्यात ताब्यात घेण्यात आल्याने मोठी खळबळ उडाली आहे.
लाचेच्या या प्रकरणामुळे शहरासह जिल्ह्यात प्रचंड चर्चेला उधाण आले आहे. हा गुन्हा की राजकीय डाव? की जाणीवपूर्वक अडकवण्याचा प्रयत्न? यावरही वर्तुळात कुजबुज सुरू आहे. कोतवाली पोलीस ठाण्यातील गांजा प्रकरणात ‘आरोपी न करता साक्षीदार करण्यासाठी’ ही लाच घेतल्याचे एसीबीकडून सांगण्यात आले आहे.
ही कारवाई लाचलुचपत प्रतिबंधक विभाग, नाशिक येथील पोलीस निरीक्षक नेहा तुषार सूर्यवंशी यांच्या पथकाने केली.
