पत्रकारांवर होणाऱ्या अन्याय, दडपशाही व खोट्या कारवाईच्या विरोधात पत्रकार एकवटले

धाराशिव | पोलीस न्यूज

पत्रकारांवर होणाऱ्या अन्याय, दडपशाही व खोट्या कारवाईच्या धमक्या दिल्या जात आहेत. तर तुळजापूर येथील ड्रग प्रकरण आदींसह विविध मुद्द्याबाबत पत्रकारांनी वास्तव मांडल्यामुळे पत्रकारांना टार्गेट करीत बघून घेईन, आमच्या कार्यकर्त्यांचा संयम सुटल्यानंतर पत्रकारांचे काय होईल ? यासह इतर प्रकारच्या धमक्या देण्याचे प्रकार हल्ली वाढलेले आहेत. त्यामुळे पत्रकारांना धमकावणाऱ्या व्यक्तींच्या विरोधात तात्काळ कारवाई करावी, अशी मागणी जिल्हाधिकारी व पोलीस अधीक्षक यांच्याकडे पत्रकारांच्या शिष्टमंडळाने एका निवेदनाद्वारे (दि.२५ ऑगस्ट) रोजी केली आहे.

दिलेल्या निवेदनात असे नमूद करण्यात आले आहे की, मागील अनेक वर्षांपासून समाजातील घडामोडी, जनहिताचे प्रश्न आणि शासनाच्या योजनांची माहिती प्रामाणिकपणे जनतेपर्यंत आम्ही पोहोचवत आहे.परंतु अलीकडील काळात आमच्यावर अन्याय, दडपशाही व खोट्या आरोपांचा प्रयत्न करण्यात येत आहे.

काही दिवसापूर्वी अवैध धंदे सरसकट का बंद केले जात नाहीत ? याबाबत दैनिक प्रजापत्रचे भूम तालुका प्रतिनिधी चंद्रमणी गायकवाड यांनी स्थानिक पोलिसांना प्रश्न विचारला त्यावेळी तुम्ही शासकीय कामात अडथळा निर्माण करता का ? असे म्हणत एनसी दाखल करून दबाव निर्माण करण्याचा प्रयत्न करण्यात आला. विशेष म्हणजे त्यांना एफआयआर प्रत देण्यास नकार देण्यात आला. तसेच धाराशिव लाईव्हचे संपादक सुनील ढेपे यांनाही तुळजापूर पोलीस ठाण्याचे पोलीस निरक्षक मांजरे यांच्याकडून धमकावण्यात आले. तर तुळजापूर येथील आनंद कंदले यांनी व त्यांच्या कार्यकर्त्यांनी थेट पोलीस अधीक्षक कार्यालयासमोरच ढेपे यांना बघून घेऊ म्हणत पोलीस तक्रार करण्यात आली आहे.

पत्रकार यांच्यावर खोटे गुन्हे नोंद करणे, त्यांच्यावर हल्ला व जीवितास धोका निर्माण झाल्यास संबंधितांना जबाबदार धरावे. कारण आनंद कंदले यांनी पोलिस अधीक्षक यांच्या समोरच कार्यकर्त्याचा प्रक्षोभ झाला असून अनुचित प्रकार होईल असे वक्तव्य केले होते. त्यामुळे अशा दबावात पत्रकार बातमीदारी कशी करणार ? असा प्रश्न पत्रकारापुढं पडला आहे. विशेष म्हणजे पत्रकारितेला लोकशाहीतील चौथा स्तंभ मानले जाते. सत्य वार्तांकन करणे हा पत्रकारांचा घटनात्मक अधिकार आहे. परंतू अशा प्रकारच्या अन्यायामुळे पत्रकारांच्या सुरक्षिततेचा प्रश्न निर्माण झाला असून लोकशाही धोक्यात येत आहे.

त्यामुळे पत्रकारांवर होणाऱ्या अन्याय, धमक्या किंवा खोट्या गुन्ह्यांची तात्काळ चौकशी करावी. दोषींवर कायदेशीर कारवाई करून पत्रकारांना न्याय द्यावा.
वार्तांकन करताना पत्रकारांच्या सुरक्षेची हमी द्यावी. तसेच पत्रकार संरक्षण कायद्याची तात्काळ अंमलबजावणी प्रभावीपणे करण्यात यावी आदी मागण्या केल्या आहेत.

या वेळी हुंकार बनसोडे, राजाभाऊ वैद्य, संतोष जाधव, बालाजी निरफळ, रहीम शेख, चंद्रसेन देशमुख, सयाजी शेळके, महेश पोतदार, शीला उंबरे, आकाश नरोटे, जुबेर शेख, किरण कांबळे, आतिक सय्यद, युसुफ मुल्ला, वैभव पारवे, सुभाष कदम, किशोर माळी, आयुब शेख, मुस्तफा पठाण, प्रमोद राऊत, कलीम शेख, पांडुरंग मते, मल्लिकार्जुन सोनवणे, अमजद सय्यद, गणेश जाधव, संतोष शेटे, कुंदन शिंदे, राकेश कुलकर्णी, विशाल जगदाळे, जब्बार शेख, कलीम सय्यद, सुरेश चव्हाण आदी पत्रकारांच्या सह्या आहेत.

काय आहे नेमके प्रकरण?

काही दिवसांखाली पोलीस निरीक्षक मांजरे यांनी दिली होती अटकेची धमकी

तुळजापूर : एका गुन्ह्याच्या चौकशीच्या नोटीसवरून तुळजापूरचे पोलीस निरीक्षक आण्णासाहेब मांजरे यांनी संपादक सुनील ढेपे यांना थेट पुण्यात येऊन अटक करण्याची धमकी दिल्याचा खळबळजनक प्रकार समोर आला होता. या प्रकरणी ढेपे यांनी पोलीस अधीक्षक, धाराशिव यांच्याकडे तक्रार दाखल करून कारवाईची मागणी केली होती.

‘धाराशिव लाइव्ह’चे संपादक सुनील ढेपे यांना तुळजापूर पोलीस ठाण्यात दाखल असलेल्या एका गुन्ह्याप्रकरणी (गु.र.क्र. १८९/२०२५) साक्षीदार म्हणून जबाब नोंदवण्यासाठी २० ऑगस्ट रोजी एक नोटीस बजावण्यात आली होती. नोकरीनिमित्त पुण्यात राहत असल्याने आणि सदर प्रकरणाची कोणतीही माहिती नसल्याने आपण हजर राहू शकत नाही, असे उत्तर ढेपे यांनी पोलिसांना दिले होते.

या उत्तराने समाधान न झाल्याने, आज सकाळी १०:३५ वाजता पोलीस निरीक्षक आण्णासाहेब मांजरे यांनी ढेपे यांना व्हाट्सॲपवर फोन करून, “नोटीसचा जबाब देण्यासाठी तुळजापूरला ये, नाहीतर उद्या पुण्यात पोलीस पाठवून तुला अटक करेन,” अशी थेट धमकी दिली.

धमकीमागे बातम्यांचा राग?

‘धाराशिव लाइव्ह’ने मागील काही दिवसांपासून तुळजापूर परिसरात वाढलेले ड्रग्जचे जाळे आणि इतर अवैध धंद्यांवर निर्भीडपणे बातम्यांची मालिका चालवली होती. या वृत्तांमुळे पोलीस प्रशासनाच्या कार्यपद्धतीवर प्रश्नचिन्ह निर्माण झाले होते. याच वृत्तांच्या रागातून, जुन्या गुन्ह्यात साक्षीदार म्हणून नोटीस पाठवून आणि आता अटकेची धमकी देऊन आपला आवाज दाबण्याचा प्रयत्न केला जात असल्याचा आरोप संपादक सुनील ढेपे यांनी केला आहे.

ढेपे यांनी पोलीस अधीक्षकांना दिलेल्या तक्रारीत म्हटले आहे की, “लोकशाहीचा चौथा स्तंभ असलेल्या पत्रकाराला अशा प्रकारे धमकी देणे हे सत्तेचा दुरुपयोग आणि अभिव्यक्ती स्वातंत्र्यावर हल्ला आहे. पोलीस निरीक्षक आण्णासाहेब मांजरे यांची सखोल चौकशी करून त्यांच्यावर कठोर कारवाई करावी.”

या घटनेमुळे जिल्ह्यातील पत्रकार वर्तुळात तीव्र संताप व्यक्त केला जात असून, पोलीस अधीक्षकांच्या भूमिकेकडे सर्वांचे लक्ष लागले आहे.