‘डॉल्बी व लेझर लाईट शो’ करणाऱ्यांना सांगोला पोलिसांचा ‘हाय व्होल्टेज’ करंट

सांगोला (प्रतिनिधी): ध्वनिप्रदूषण वाढवणाऱ्या आणि आरोग्यासाठी हानिकारक असलेल्या डॉल्बी व लेझर शोवर प्रशासनाने यावर्षी बंदी घातली आहे. तरीही, बेकायदेशीरपणे डॉल्बी व लेझर लाईट शो आयोजित करणाऱ्यांवर सांगोला पोलिसांनी गुन्हे दाखल केले आहेत. यात 8 डॉल्बी मालक व 2 गणपती मंडळ अध्यक्षवर गुन्हा असे 6 प्रकरणात १० जणांवर गुन्हे दाखल झाले आहेत. सांगोला पोलिसांनी घेरडी येथे 4 जणांवर, वाढेगाव येथे 4 जणावर आणि सांगोला शहरात 2 जणावर कारवाई केली आहे. या कारवाईच्या ‘हाय व्होल्टेज’ करंटमुळे डॉल्बीधारकांचे धाबे दणाणले आहेत.

याबाबत अधिक माहिती अशी की, ४ सप्टेंबर रोजी पोलीस उपनिरीक्षक पोपट काशीद आणि पोलीस कर्मचारी, होमगार्ड हे घेरडी दूरक्षेत्र हद्दीत गणेशोत्सवानिमित्त गस्त घालत होते. यावेळी, घेरडी येथील मुख्य चौकात सार्वजनिक रस्त्यावर मिरवणूक काढली जात असून, त्यात बेकायदेशीर डॉल्बी सिस्टम व लेझर लाईटचा शो वापरला जात असल्याची माहिती पोलिसांना मिळाली.

मिळालेल्या माहितीच्या आधारे सांगोला पोलीस रात्री ९ वाजण्याच्या सुमारास घटनास्थळी पोहोचले. तिथे बेकायदेशीर ‘डॉल्बी व लेझर शो’ सुरू असल्याचे दिसल्याने, पोलिसांनी कारवाई करत डॉल्बीधारकांविरुद्ध गुन्हा दाखल केला आहे. या प्रकरणी डॉल्बी मालक विशाल निळे (रा. पारे, ता. सांगोला, जि. सोलापूर), सौरभ खामकर (रा. नारायणगाव, ता. शिरूर, जिल्हा पुणे), संकेत ढवळे (रा. मंगळवेढा, जि. सोलापूर) आणि अमोल दामाजी पाटील (रा. कुंभारी, ता. जत, जि. सांगली) यांच्या विरोधात पो. कॉ. रविंद्र साबळे यांनी ५ सप्टेंबर रोजी फिर्याद दिली आहे.

तसेच, ४ सप्टेंबर रोजी सांगोला पोलीस गणेश विसर्जन मिरवणुकीच्या पार्श्वभूमीवर वाढेगाव येथील शिवराज गणेश मंडळ दिघेवाडी आणि अष्टविनायक गणेश तरुण मंडळ वाढेगाव येथे बंदोबस्तासाठी नेमले होते. बंदोबस्तादरम्यान, वरील दोन्ही मंडळांनी विसर्जन मिरवणुकीसाठी डी.जे. डॉल्बी आणलेला होता. पोलिसांनी मंडळांना सार्वजनिक गणेशोत्सव मिरवणुकीत डॉल्बी सिस्टम व लेझर लाईट शोचा वापर करण्यास मनाई असल्याचे सांगितले. असे असूनही, सायंकाळी ७ वाजण्याच्या सुमारास डी.जे. सुरू करून, आवाज वाढवत वाढेगाव गावात मिरवणूक काढण्यात आली.

जिल्हाधिकाऱ्यांच्या आदेशाचे उल्लंघन केल्याप्रकरणी, शिवराज गणेश मंडळाचे अध्यक्ष विजय विलास लोकरे (रा. वाढेगाव, ता. सांगोला, जि. सोलापूर) व इतर, तसेच डी.जे. मालक समाधान शिवाजी मंडले (रा. करगणी, ता. आटपाडी, जि. सांगली) आणि त्यांच्या टेम्पो वाहनावरील डी.जे., आणि अष्टविनायक गणेश मंडळाचे अध्यक्ष कुमार गणपत शिनगारे (रा. वाढेगाव, ता. सांगोला) व डी.जे. टेम्पो मालक अतुल गौतम माने (रा. वाढेगाव, ता. सांगोला) यांच्याविरोधात ४ सप्टेंबर रोजी पो.हे. कॉ. विलास बनसोडे यांनी फिर्याद दिली आहे.

याशिवाय, ४ सप्टेंबर रोजी सांगोला शहरात गणेश विसर्जन मिरवणुकीदरम्यान, लोहार गल्ली येथील नरसिंह गणेश मंडळाकडून सार्वजनिक रस्त्यावर मिरवणूक काढली जात असून, त्यात डॉल्बी सिस्टम व लेझर लाईटचा शो वापरला जात असल्याची माहिती गस्त घालणाऱ्या पो. हे. कॉ. संतोष देवकर, पो. ना. नलवडे, पो. कॉ. वाडकर यांना मिळाली. तेव्हा, रात्री सव्वा सात वाजण्याच्या सुमारास पोलीस घटनास्थळी पोहोचले असता, तिथे डॉल्बी सिस्टम व लेझर लाईटचा शो वापरून डॉल्बी वाजवला जात असल्याचे दिसून आले. या प्रकरणी राजू बोत्रे आणि आप्पा ऐवळे (रा. सांगोला) यांच्या विरोधात पो. कॉ. अमोल वाडकर यांनी फिर्याद दिली आहे.